De Marc Fischbach kënnt den 22. Februar 1946 an der Stad op d’Welt. E studéiert Jura zu Nanzeg, gëtt Affekot a spéider Nottär. Als Member vun der CSV ass e vun 1979 bis 1984 Deputéierten zu Lëtzebuerg an huet och e Sëtz am Europaparlament. 1984 gëtt en an der CSV/LSAP-Regierung Minister fir Landwirtschaft a Wäibau, Arméiminister, Minister fir d’Fonction publique a Minister fir Sportunterricht a Sport. An de Regierunge vun 1989 bis 1995 ass e fir d’Ressorte Bildung, Justiz an d’Fonction publique zoustänneg. Vun 1995 bis 1998 ass de Marc Fischbach Justiz- a Budgetsminister a Minister fir d’Relatioune mam Parlament. 1998 geet en als Riichter un den Europäesche Geriichtshaff fir Mënscherechter, 2004 kënnt en op Lëtzebuerg als éischten „Ombudsmann“ zeréck, e Posten, deen e bis 2012 hält. Zënterhier ass de Marc Fischbach President vun der Confédération des Organismes Prestataires d’Aides et de Soins (COPAS).
