Gesetz vum 21. Mee 1979 iwwer 1. d’Organisatioun vun der Beruffsausbildung an dem Enseignement secondaire technique, 2. d’Organisatioun vun der berufflecher Weiderbildung

An der zweeter Hallschent vum 20. Joerhonnert gi verschidden Initiative vun der Beruffsausbildung wéi Owescoursen, „Preapprentissage“-Klassen oder vollzäit „Apprentissage“-Klassen erweidert oder entwéckelt, oft op Initiativ vun de Beruffskummeren. All dës Initiative kënne sech awer net op en Organgesetz beruffen. D’Gesetz vun 1979 strieft eng déifgräifend Ëmstrukturéierung vun der berufflecher Bildung un a soll gläichzäiteg verschidden Initiativen, déi scho bestinn, homogeniséieren a koordinéieren.

Sou gëtt déi mëttler Schoulbildung an den Enseignement secondaire technique ëmgewandelt, deen e kohärente System fir déi ganz Beruffsausbildunge bilt. Aus de Mëttelschoule gi Lycées techniques. Den Enseignement secondaire technique gëtt an e Cycle inférieur, de sougenannte Cycle d’observation et d’orientation, e Cycle moyen an e Cycle supérieur ënnerdeelt (Art. 1).

De Cycle d’observation et d’orientation vermëttelt de Schüler méi eng breet Allgemengbildung. Um Enn vun dësem Zyklus kréien d’Schüler eng Zensur, déi hinnen attestéiert, datt si d’Enn vun hirer Schoulflicht erreecht hunn (Art. 4). Schüler, déi wëlle weider an d’Schoul goen, kommen an de Cycle moyen, deen an e Régime technique an e Régime professionnel ënnerdeelt ass. De Régime technique bereet d’Schüler a Vollzäitunterricht op verschidde Beruffer vir (Art. 5). D’Beruffsausbildung dergéint ass an zwou Filièren ënnerdeelt, „caractérisé par l’apprentissage qui comporte la formation pratique dans une entreprise sous contrat d’apprentissage et la fréquentation de cours professionnels concomitants“ (Art. 5 an 8). Um Enn vun der Léier steet en Ofschlossexamen, souwuel fir de Régime professionnel wéi fir de Régime technique. Schüler, déi den Exame gepackt hunn, kréien de Certificat d’aptitude technique et professionnelle (CATP) (Art. 6). Schüler, déi op hirem schoulesche Parcours net alles gepackt hunn, „peuvent cependant se présenter aux épreuves de la partie pratique de l’examen de fin d’apprentissage. Un certificat de capacité manuelle (CCM) leur est délivré s’ils ont passé avec succès ces épreuves y compris l’examen oral portant sur la théorie professionnelle, accéder à une formation préparant au Certificat de Capacité Manuelle (CCM)“ (Art. 9).

Nieft der Ausbildung, déi mat engem CATP ofschléisst, kënne Schüler a Schülerinnen, déi de Régime technique absolvéiert hunn, hir Ausbildung am Cycle supérieur fortsetzen. Dëse Cycle ëmfaasst d’Fachrichtung Verwaltungswiese vum Enseignement technique général an d’Technikerausbildung. Um Enn muss allkéiers en Exame gemaach ginn. Huet de Schüler den Exame gepackt, kritt en en Diplom, op deem seng Ausbildung steet an d’Fächer, an deenen en en Exame gemaach huet (Art. 20). Schüler, déi d’Fachrichtung Verwaltungswiesen oder den Enseignement technique général bestanen hunn, kréien eng Ofschlosszensur mam Vermierk, „que le candidat possède les connaissances requises pour aborder les études techniques supérieures ou universitaires dans sa spécialité“. Domat bidden d’Lycées techniques eng alternativ Méiglechkeet, fir d’Studien op enger Héichschoul fortzesetzen , wat déi technesch Ausbildung enorm opwäert. Des Weidere mécht d’Vereenheetlechung vun de Strukturen zesumme mat der Gläichwäertegkeet vun den Ofschlossdiplomer vun deene verschiddenen Ausbildungen am Enseignement technique général den Iwwergang vun enger Ausbildung zur anerer méi einfach.

Ausser der Beruffsausbildung vun de jonke Schüler gëtt duerch d’Gesetz vum Mee 1979 och déi berufflech Weiderbildung reorganiséiert.