D’Covid-Pandemie stellt de Schoulsystem op eng haart Prouf

Wärend Méiglechkeete fir de Schoulunterricht vun doheem aus geschafe ginn, gëtt am Mäerz 2020 eng Helpline ageriicht, fir d’Elteren an d’Léierpersonal op pedagogeschem Plang ze informéieren, ze beroden an ze ënnerstëtzen. Zur selwechter Zäit ginn d’Websäit schouldoheem.lu mat Ressourcen a pedagogeschem Material an de Beräich kannerdoheem.lu mat Iddie fir Aktivitéite mat Kanner vun 1 bis 12 Joer bereetgestallt. D’Campagne Well-being@Home mat Infoen zu Moossname fir eng gutt mental Hygiène an enger Krisesituatioun gëtt lancéiert. Den 20. Abrëll fänken d’Hëllefs- a Betreiungsaktivitéite fir d’Schüler erëm un. Enn Abrëll/Ufank Mee maachen d’Schüler an d’Enseignantë vun den Ofschlossklassen e Large-Scale-Testing, éier d’Coursen de 4. Mee 2020 erëm ufänken. D’Ofschlossexame ginn adaptéiert a fänken de 25. Mee 2020 un. Den Unterricht gëtt den 11. Mee 2020 an deenen anere Lycéesklassen erëm opgeholl (gespléckte Klassen no engem wëchentleche Rotatiounsprinzip) an de 25. Mee am Enseignement fondamental. D’Betreiungsstrukture fonctionéieren erëm wéi gewinnt.

Den 29. Juni 2020 leeft de Schoulbetrib erëm normal. An der Schoulvakanz bitt d’„Summerschool“ Nohëllefstonne fir d’Schüler an d’Schülerinnen aus der Grondschoul an dem Enseignement secondaire. Dossieren, fir de Stoff ze widderhuelen an opzefrëschen, sinn op www.schouldoheem.lu disponibel. Éier d’Schoul Ufank September erëm ufänkt, gëtt e Large-Scale-Testing fir d’Léierpersonal an d’Schüler ugebueden.

De 15. September 2020 fänkt d’Schoul erëm un, mat ganze Klassen an enger Maskeflicht fir Kanner vu 6 Joer un, wann se net op hirem Stull am Klassesall sëtzen. E Stufeplang gouf ausgeschafft fir de Fall, datt et positiv Fäll vu Covid-19 an der Klass gëtt. De Plang gëtt e puermol ugepasst an de 16. November setzt de Ministère mobil Ekippe fir d’Covid-Tester an de Schoule vum Primär a Secondaire an.

Mat der Rentrée gëtt och déi nei Formatioun Diplom+ ageféiert, en zousätzlecht Ausbildungsjoer fir jonk Leit, déi de Secondaire resp. hir Beruffsausbildung ofgeschloss hunn. Déi eng kënnen dat Joer notzen, fir prett ze sinn, wann den Aarbechtsmaart erëm unzitt a gutt qualifizéiert Leit gebraucht ginn, déi aner kënne beräichsiwwergräifend Kompetenzen opbauen, déi hinnen als spéider Studente kënnen nëtzlech sinn.

Vum 30. November 2020 u gëllt fir déi iewescht Klasse vum Secondaire (4e, 3e an 2e) erëm de Rotatiounsprinzip. De 25. November gëtt decidéiert, de Secondaire an Zukunft a Semesteren anzedeelen.

Den 18. Dezember 2020 gëtt eng Helpline an d’Liewe geruff fir de Kanner,Jugendlechen, Elteren a Famillen eng Hëllef an eng psychologesch Ecoute unzebidden.

D’Infektiounszuele klammen erëm, duerfir ginn de Presenzunterricht an d’Präsenzaktivitéite vum 4. bis den 8. Januar a vum 8. bis den 12. Februar, kuerz virun der Fuesvakanz, ausgesat. De 4. Januar fänkt de Programm „Schoul doheem on air“ als Live-Stream un. Erëm gëtt dem Léierpersonal an de Schüler e Large-Scale-Testing virum Unterricht ugebueden. Am Januar ginn CO₂-Moossapparater un d’Primärschoulen an d’Lycéeë verdeelt, fir drun ze erënneren, wéi wichteg et ass, d’Klassesäll reegelméisseg ze lëften. D’Léierpersonal an de Grondschoulen an de Kompetenzzentre kréien FFP2-Masken.

De „Stufeplang“ gëtt verschäerft, virun allem duerch eng allgemeng Maskeflicht, méi Covid-Tester a lokal an national Mossnamen, sollt sech d’Situatioun verschlechteren. De 15. Februar gëtt e Large-Scale-Testing fir d’Fachkräften an der Educatioun a fir déi Schoulen ageleet, déi am stäerkste vum Virus betraff sinn. Gläichzäiteg gëtt et eng Rei nei Ënnerstëtzungsmoossname fir Kanner a Jugendlecher. Eng Pilotphas fir den Asaz vu Covid-Schnelltester an de Grondschoulen a Lycéeë fänkt un. De 15. Abrëll gëtt ugekënnegt, datt vum 19. Abrëll bis de 15. Juli massiv Covid-Tester verdeelt ginn.

E puer Wochen no der Rentrée am September 2021 klammen d’Zuele vun den Nei-Infizéierunge bei Kanner ënner 12 Joer däitlech, der Grupp vu Persounen deemno, déi net geimpft sinn. Am November 2021 gëtt et an der Grondschoul méi Fäll wéi am selwechten Zäitraum 2020.

D’Tester ginn erëm verstäerkt. De Ministère verzicht awer op méi radikal Moossname wéi en allgemengen „Homeschooling“, d‘Verlängerung vun der Chrëschtvakanz oder eng Test- a Maskeflicht.

D’Lag, wat d’Covid-19-Infektiounen ugeet, entspaant sech am Fréijoer 2022. Vum 19. Abrëll 2022 un, d. h. no der Ouschtervakanz, gëtt an de Schoulen net méi getest. Mat dëser Decisioun fonctionéiert an de Schoulen erëm alles wéi gewinnt.