D’Gesetz vum 20. Abrëll 1881 iwwer d’Organisatioun vum Primär

D’Loi Kirpach reforméiert de Primär, dee bis zu deem Zäitpunkt op der Grondlag vum Gesetz vun 1843 fonctionéiert huet. Eng wichteg Ännerung betrëfft de Léierplang: Zu de Fächer, déi am Schoulgesetz vun 1843 festgeluecht sinn, nämlech Reliouns- a Moralunterricht, Liesen a Schreiwen am Däitschen a Franséische souwéi Rechnen, kommen elo Gymnastik, Comptabilitéit, Linearzeechnen, naturwëssenschaftlech Elementer, Gesang, Geografie, Gewiichter a Moossen derbäi (Art. 1). Dat ëmmer méi staarkt nationaalt Bewosstsi gëtt duerch d’Aféierung vun engem Cours iwwer déi national Geschicht erëmgespigelt. Op de Léierplang fir Meedercher kënnt nach Strécken (Art. 1).

Mat der Loi Kirpach gëtt d’Roll vun der Kierch am  Primär revidéiert. Fir déi national Unterrichtskommissioun, den Nofollger vun der kinneklech-groussherzoglecher Unterrichtskommissioun aus dem Gesetz vum 26. Juli 1843, gëtt d’Zuel vun de Geeschtlechen erofgesat (Art. 78). D’Opsiicht iwwer d’Léierpersonal gëtt vum Staat an der Gemeng iwwerholl. De Klerus däerf net méi zu all Moment an d’Schoul eran, mee muss sech u fix Zäiten halen (Art. 71). E behält just nach d’Kontroll iwwer de Reliounsunterricht. De Paschtouer aus der jeeweileger Par stellt weiderhin zesumme mam Buergermeeschter an dem Schäffe vun der Gemeng d’Certificaten iwwer déi biergerlech a reliéis Sittlechkeet aus (Art. 54). D’Gesetz reduzéiert esou den Afloss vun der Kierch op d’Schoul a verstäerkt d’Trennung vu Kierch a Staat.

D’Hierarchiséierung vun de Léierpersoune gëtt duerch d’Andeelung a Räng, déi op „Kenntnisser“ a „Fäegkeete“ baséieren, verstäerkt. Deen nächste Rang erreecht een duerch eng Prüfung (Art. 53).

D’Gesetz gesäit och Schoule fir Erwuessener, wéi Owesschoulen, vir a Formatioune fir eng Gesellschaft, déi sech séier verännert. Dës Schoulen hunn en immense Succès. 1893 zielt de Kirpach der schonn iwwer 400 (Art. 105).